GANITO katapang ang ilang negosyante sa Pilipinas. Kahit pinatawan na ng parusa dahil sa paglabag sa batas, lumalabag pa rin sa utos ng pamahalaan.
Kitang-kita ng dalawang mapupungay kong mata ang yunit ng Safeway Bus Lines, Inc. na may plakang TXP-623 ay napakalayang bumiyahe nitong Marso 27 (Biyernes).
Nakita ko ang nasabing yunit sa East Ave. sa Quezon City habang nakasakay ako sa ibang bus.
Tandaan natin ito: Batay sa rekord ng LTFRB, ang yunit ng Safeway na may plakang TXP-623 ay isa sa 16 na yunit ng nasabing kumpanya ng bus na sinuspinde ng Land Transportation and Franchising Board (LTFRB) nang 30-araw dahil sa napakaraming paglabag sa batas.
Nadiskubre ang mga paglabag makaraan ang isang yunit nila (TXP-845) ay nakamatay ng 14-taong gulang na si Abby Cunanan nitong Marso 1 sa kanto ng EDSA at East Ave.
Ang lakas ng loob naman ng may-ari ng Safeway sa pagpapabiyahe ng suspendidong yunit.
Mayroon ka bang padrino o pader na kinakapitan sa LTFRB?
Dapat sigurong agad itong sitahin ng LTFRB dahil lantarang pambabastos ito sa kanilang kapangyarihan na itinakda ng batas.
PROSTITUSYON SA PASAY, ‘LITTLE MAYOR’ ANG NINONG?
Kaya pala napakalalakas ng loob ng Miss Universe, XTD KTV, E.A. International at Bachelor’s Mansion sa Lungsod ng Pasay na mag-alaga at mag-alok ng mga napakababatang babae sa mga kliyente nito, lalo na sa mga dayuhan, ay ‘Little Mayor’ pala ang kinakapitan nila sa administrasyon ni Mayor Tony Calixto, Jr.
Ang Little Mayor kung ituring sa administrasyon ni Calixto ay hindi ang city administrator, kundi ang hepe ng Business Permit and Licensing Office (BPLO) na si Boyet del Rosario.
Maaaring hindi lang malakas na kapit, kundi may parating pa ang mga may-ari ng mga club sa kinauukulan.
Totoo ba ito, Little Mayor, (ay!) BPLO Chief (pala) Del Rosario?
Com’on, hindi naman tayo ipinanganak kahapon upang hindi natin maintindihan ang ganyang kalakaran.
Teka, sino ba ng kinauukulan sa Pasay? Si Boyet o si Mayor Calixto?
***
Problema at reaksyon n’yo, itawag sa: 09985650271 o mag-email sa: akosibadilla@yahoo.com. BADILLA NGAYON/NELSON BADILLA
.. Continue: Remate.ph (source)
No comments:
Post a Comment