ANG AHAS, ADAN AT EBA SA HALAMANAN

SUMPA ang aabutin ni Pangulong Noynoy Aquino kabilang na ang mga heneral na umuto sa kanya kaya nailagay sa kumunoy ng kamatayan ang tinaguriang ‘SAF 44’.

Ito’y kung pagbabasehan natin ang naging hatol ng Panginoong Dios sa ahas na umuto sa uto-utong si Eba na kung saan nagpauto naman si Adan doon sa halamanan.

Nang matuklasan ng Dios na kumain si Adan ng ipinagbabawal na bunga ng kahoy sa halamanan, agad ininguso ni lalaki na inuto siya nung babaeng si Eba na ibinigay sa kanya ng Dios.

Tinanong naman niya itong si Eba subalit mabilis niyang sinisi ang ahas na umuto sa kanya upang kumain ng nasabing ipinagbabawal na bunga. O ‘di ba, parang sina Purisima, Napeñas at PNoy lang ang eksena?

Isinumpa ng Dios ang ahas na umuto kina Adan at Eba kaya gumapang sa lupa at kumain ng alikabok si Mamang Puring este, si ahas. Si Napeñas naman, este, si Eba naman na nagpauto ay isinumpa rin gaya ni ahas.

Kasama sa sumpa kay Eba ang paghihirap sa kanyang panganganak kabilang na ang pagiging panginoon ng asawang lalaki sa kanyang buhay. Kaya tayong mga macho guwapito, huwag kang andres de saya tssk tssk.

Aba’y hindi rin ligtas sa sumpa ang uto-utong si PNoy, este, mali na naman, si Adan pala. Habambuhay siyang tatagaktak ang pawis sa trabaho upang mabuhay.

Pero ang pinakamasakit ay ang sumpa ng kamatayan.

Ganito ang naganap kung sisilipin natin ang ilang mga talata sa ikatlong kapitulo ng aklat ng Genesis ng Bibliya. Isusumpa ng Dios ang umuto na si Puring, ang uto-utong si Napeñas at ang nagpauto na si PNoy.

Hindi dahilan ang katwiran ni PNoy na nauto lamang siya ng mga heneral kaya wala siyang kasalanan. Batay sa pamantayan ng Dios ay may pananagutan din ang nagpauto tulad nina Adan at Eba.

Hindi ubra sa Dios ang nguso-nguso ng sisi sa iba gaya ng ginawa ni PNoy sa isyu ng engkwentro sa Mamasapano. Walang duda na makakamtam din nila ang sumpa ng kanilang kapalkapan. Biyak ang nguso nila pagdating ng araw!

***

Para sa komento o suhestyon: eksperto71@gmail.com EKSPERTO/JOIE O. SINOCRUZ, Ph.D.

.. Continue: Remate.ph (source)

ANG AHAS, ADAN AT EBA SA HALAMANAN