Bail petition ni Napoles, ibinasura ng korte

Ibinasura ng Makati City Regional Trial Court (RTC) ang petiton for bail ng negosyanteng si Janet Lim-Napoles sa kinakaharap nitong kasong serious illegal detention.

Sa inilabas na desisyon ni Makati RTC Branch 150 Judge Elmo Alameda, tinanggihan ng korte ang hirit ni Napoles na makapagpiyansa sa kasong isinampa ng pinsan at pork barrel scam whistleblower na si Benhur Luy.



Sa unang pagdinig sa naturang petisyon, iginiit ni Luy sa hukuman na dapat managot si Napoles sa pagdetine at pagbabanta sa kanyang pamilya.

Noong Disyembre 19, 2012, ikinulong umano si Luy sa isang silid sa Bahay ni San Jose sa Magallanes Village sa Makati City.

“Verily, the quantum of evidence presented is strong which leads this court to conclude that the crime of Serious Illegal Detention has been committed as charged and that accused Janet Lim Napoles will probably be punished if the law is administered,” sabi ni Alameda.

“In fact, the criminal intent of Jojo in detaining Benhur at Bahay ni San Jose in Magallanes Village, Makati City was not known to Janet but also was shared by her in conspiracy with Jojo,” dagdag ng huwes.

Kasalukuyang nakakulong si Napoles sa Fort Sto. Domingo sa Sta. Rosa, Laguna habang pinaghahanap ng awtoridad ang kanyang kapatid at kapwa akusado na si Reynald Lim.

Si Napoles ang itinuturong utak sa P10-bilyon pork barrel fund scam at Malampaya Fund anomaly. – Bella Gamotea

.. Continue: Balita.net.ph (source)

Bail petition ni Napoles, ibinasura ng korte