KABALIGTARAN

Ngayon ko lamang napag-alaman ang pagsusulong ng mambabatas ng isang panukala na nagpapataw ng parusang kamatayan o death penalty sa isang dayuhan na magpapasok sa ating bansa ng dangerous drugs at iba pang kauri nito. Nangangahulugan ba na ang naturang mga dayuhan o foreign nationals na lalabag sa Comprehensive Anti-Drugs Act (CADA) of 2002 ay bibitayin sa Pilipinas kahit matagal nang inalis ang death penalty sa ating bansa?



Totoo na ang sinumang kasangkot sa drug operation saanmang bansa sa daigdig, ay kailangang patawan ng pinakamabigat na parusa, lalo na nga ang mga dayuhan na kinakasangkapan ang ating bansa para sa kanilang drug operation. Katunayan, halos lahat ng bansa ay nagpapatupad ng death penalty sa karumal-dumal na krimen – kabilang na ang drug trafficking. Maging ang ating mga kababayan na nasasangkot sa gayong kahindik-hindik na krimen, tulad ng pagpatay at paggahasa ng isang ama sa kanyang sariling anak, ay dapat ding mamatay sa pamamagitan ng lethal injection.

Sa bahaging ito, maitatanong: hindi ba isang malaking kabaligtaran o kabalintunaan na ang mga dayuhang lumalabag sa CADA ay papatawan ng death penalty samantalang ang ating mga kababayan na may gayon ding kasalanan ay maililigtas sa kamatayan? Hindi ba ang ating mga kababayan na nahatulan dahil sa drug trafficking ay kagyat na binibitay sa ibang bansa. Katunayan, isa na namang kababayan natin ang napipintong isalang sa death penalty sa isang bansa sa Middle East.

Ang dapat atupagin ng mga mambabatas ay muling buhayin ang parusang kamatayan na inalis dahil lamang sa kapritso ng ilang sektor ng sambayanan. Natitiyak ko na higit na nakararami ang naghahangad na maibalik ang death penalty sa karumal-dumal na mga krimen. Matagal nang napatunayan na ang ganitong parusa ay epektibong hadlang sa kahayupan ng mga kampon ni Satanas.

Ito ang dapat pagtuunan ng pansin ng mga mambabatas kung nais nilang mabawasan kundi man ganap na masugpo ang kriminalidad sa ating lipunan.

.. Continue: Balita.net.ph (source)

KABALIGTARAN