ISANG lola ang patay habang kritikal naman ang kakambal nito nang looban ng mga hindi nakilalang kalalakihan ang kanilang bahay sa Quezon City nitong Huwebes ng gabi (Pebrero 26).
Dead-on-the-spot sanhi ng tinamong pinsala sa ulo ang biktimang si Purisima Toregrosa, 76, habang kritikal naman sanhi ng paghataw ng matigas na bagay sa ulo ang kakambal nitong si Pura, kapwa ng Talayan Village, Q.C.
Sa ngayon ay blangko pa ang mga tauhan ng QCPD-Criminal Investigation and Detection Unit (CIDU) kung sino ang may kagagawan ng krimen.
Sa imbestigasyon, isang anak ni Pura na si ‘Albert’ ang umuwi dakong 9:00 at nag-doorbell ito pero wala aniyang nagbukas ng gate.
Para hindi na makaistorbo pa, pumasok na lang siya at napansing bahagyang nakabukas ang pinto ng bahay.
Ilang sandali pa, nakita niya agad ang kanyang tiyahin na duguang nakahandusay sa sala at wala ng buhay.
Pagpasok naman niya sa kanyang kuwarto, nakita niya ang kanyang nanay na nasa ilalim ng kanyang kama na duguan din at nag-aagaw-buhay.
“May pasa ang mukha niya, maitim… parang pinukpok siguro,” ni Albert.
Agad namang humingi ng tulong si Albert sa mga barangay officials para madala ang kanyang nanay sa ospital.
Nang tanungin si Albert ay napag-alamang nawawala ang kanilang television set, palatandaan na pagnanakaw ang motibo sa karumal-dumal na krimen.
Ayon sa CIDU, hindi ito ang kauna-unahang may naganap na ganitong insidente sa lugar. Ilang taon na rin ang nakakalipas nang paslangin ang ilan sa mga kalapit na residente at sinunog pa ang bahay matapos pagnakawan. ROBERT TICZON
.. Continue: Remate.ph (source)
No comments:
Post a Comment