NAGKABUTAS-BUTAS ang katawan ng isang opisyal ng Autonomous Region in Muslim Mindanao (ARMM) nang barilin ito sa Cotabato City kaninang umaga (Pebrero 27).
Hindi na umabot nang buhay sa Cotabato Emergency Specialist sanhi ng tinamong 11 tama ng bala ng cal. 45 sa dibdib at tagiliran ang biktima na si Norodin Manalao-Executive Director ng Regional Reconcialation and Unification Council (RRUC-ARMM).
Blangko pa ang Cotabato City Police Office kung sino ang nasa likod ng pang-aambush pero isa sa sinisilip na motibo ay may kaugnayan sa kanyang trabaho.
Sa ulat, naganap ang insidente 8:05 a.m. sa tapat ng Mega Market sa Cotabato City. Lulan umano ang biktima ng kanyang Mitsubishi Pajero at hinihintay ang kanyang asawang namimilli sa naturang palengke.
Pero habang nasa kanyang sasakyan, sinabi ni Cotabato City Police director S/Supt. Rolen Balquin na nilapitan ng suspek ang biktima saka malapitang pinutukan sa kinauupuan nito.
Ikinalungkot naman ni ARMM Gov. Mujiv Hataman ang sinapit ni Director Manalao na kilalang tagasulong ng kapayapaan sa rehiyon sa pamamagitan na rin ng pag-aayos ng mga rido o away-pamilya.
Inatasan na ni Cotabato City Mayor Japal Guiani ang pulisya para mahuli ang pumatay sa biktima na hinihinalang isang hired killer. ROBERT TICZON
.. Continue: Remate.ph (source)
No comments:
Post a Comment