PANAHON na siguro para pagsisibakin ni Pang. Aquino sina Presidential Adviser on the Peace Process Sec. Teresita Deles at Government Peace Panel Chair Miriam Coronel-Ferrer dahil sa patuloy nilang pagsisilbi na parang mga abogado ng Moro Islamic Liberation Front (MILF).
Mantakin ninyo, bilyon-bilyong piso ang ginugugol ng ating gobyerno para lamang magkaroon ng kapayapaan sa Kamindanaoan pero patuloy pa rin ang karahasan na nagaganap sa rehiyon.
Sa halip kasi na bigyang hustisya nina Deles at Ferrer ang sinapit na kamatayan ng Fallen 44 ng Special Action Force (SAF) commandos sa kamay ng pinagsanib na puwersa ng Moro Islamic Liberation Front (MILF) at Bangsamoro Islamic Freedom Fighters (BIFF) ay sila pa ang nagsisilbing mga abogado ng mga MILF.
Nagbigay tuloy ng paalala si Magdalo Partylist Rep. Ashely Francisco Acedillo kina Deles at Ferrer na ang tungkulin ng mga ito ay isulong ang pambansang interes at hindi raw ang protektahan ang interes ng MILF.
Aba kung inyo kasing iisipin, ay nakababahala na ang naging pahayag ni Ferrer na nakapaloob daw sa Bangsamoro Basic Law (BBL) ang training ng MILF.
Pero nang pag-aralan ni Rep. Acedillo ang probisyon sa BBL, wala raw siyang nabasa na pinapayagan ang pagsasanay ng MILF.
Ayon pa sa mambabatas, maituturing daw na pagtataksil o kawalang sinseridad sa usaping pangkapayapaan dahil hindi na raw kailangang magpalakas ng pwersa ang MILF dahil taliwas daw ito sa layunin ng isinusulong na peace process.
Maging itong Office of the Presidential Affairs on Peace Process ni Sec. Deles ay nagbubulag-bulagan sa mga tunay na pangyayari sa naganap sa Mamasapano, Maguindanao.
Para sa akin ay itigil na ang pagsusulong ng Bangsamoro Basic Law!
o0o
Anomang reklamo o puna ay i-text lang sa 09189274764, 09266719269 o i-email sa juandesabog@yahoo.com. JUAN DE SABOG/JOHNNY MAGALONA
.. Continue: Remate.ph (source)
No comments:
Post a Comment