Bebot patay, kapatid at ina kritikal sa pananaga

NAMATAY habang ginagamot sa ospital ang isang babae habang nasa kritikal na kondisyon naman ngayon ang kanyang kapatid na lalaki at kanilang ina matapos silang pagtatagain sa kanilang bahay sa Bgy. La Paz sa Zamboanga City.

Kinilala ng pulisya ang namatay na si Rica Esteban Macoycruz, 32, na nagtamo ng mga sugat sa ulo at iba pang bahagi ng katawan.

Ayon kay S/Inp. Karib Muharram, hepe ng Ayala police station 9, sumugod ang suspek na si Winston Loba Solis, 40, sa bahay ng mga biktima na armado ng itak.

Unang lumabas ng kanilang bahay ang 19-anyos na si Julius Esteban Macoycruz para harapin ang galit ng suspek nang bigla na lamang siyang pinagtataga nito.

Nang makita naman ng ate at ng ina ni Julius na si Alda Esteban Macoycruz, 58, ang pangyayari ay agad silang lumabas ngunit pati sila’y pinagtataga rin ng suspek.

Nakatakas ang suspek matapos ang krimen pero sa tulong ng mga opisyal ng barangay at pulisya ay nahuli rin ito.

Sinampahan na ng kasong murder at double frustrated murder ang nahuling suspek.

Problemang pamilya ang lumalabas na motibo sa madugong insidente dahil matagal na rin umanong may alitan ang suspek at ang mga biktima. MARJORIE DACORO

.. Continue: Remate.ph (source)

Bebot patay, kapatid at ina kritikal sa pananaga