IPINADAMPOT ng kanyang mga kapitbahay ang isang lalaking nagpasingaw ng teargas sa kanilang lugar sa Quezon City nitong Martes ng gabi, Oktubre 28.
Nagpalusot pa umano ang suspek na si Sammy Sanchez, sa mga tauhan ng Quezon City Police District (QCPD) – station 9, na nakainom lang siya noon at ipinapakita lang sa kanyang mga kapitbahay kung paano labanan ang mga magnanakaw kapag umatake sa kanilang lugar.
Nagpadala naman agad sa pagamutan ang mga residente ng Project 2, Q.C. matapos makaranas ng pananakit ng mata at pagsusuka.
Sa ulat, naganap ang insidente dakong 10:15 p.m. sa Project 2 and 3, Q.C.
Ayon sa QCPD station 2, may 20 residente ang nagreklamo sa kanilang istasyon dahil bukod sa pagsusuka at pananakit ng mata ay may hinimatay pa sanhi ng nakakasulasok na amoy ng teargas na pinasingaw ng suspek.
Tawag ng tungkulin, ginalugad ng mga tauhan ng pulisya ang lugar at nang makita ay dinampot si Sanchez.
Sa presinto, iginiit ni Sanchez na bigay lang sa kanya ng isang kaibigan ang naturang teargas at pinasingaw lang niya ito paitaas para hindi maapektuhan ang kanyang mga kapitbahay.
Nahaharap sa kasong alarm scandal at slight physical injury ang suspek na ngayon’y nakakulong na sa Anonas police station. ROBERT TICZON
.. Continue: Remate.ph (source)
No comments:
Post a Comment