DAHIL lamang sa pag-aagawan sa pasahero, kinuyog ng grupo ng kalalakihan ang isang tricycle driver kung saan binaril pa ang biktima na nagresulta sa kamatayan nito kahapon ng hatinggabi sa Pasay City.
Namatay habang ginagamot sa Pasay City General Hospital (PCGH) ang biktimang si Benjamin Alcantara, Jr., 31, ng 350 Libertad St. sanhi ng isang tama ng bala ng hindi pa batid na kalibre ng baril sa kanang balikat.
Nakatakas naman ang limang suspek na ang isa ay nakilala lamang sa alyas Bobby, residente ng Decena St., na siyang unang naka-alitan ng biktima.
Sa imbestigasyon ni SPO1 Cris Gabutin ng Pasay police, armado umano ng baton ang suspek nang habulin ang biktima kamakalawa ng gabi matapos magtalo hinggil sa agawan ng pasahero.
Nagawa namang makatakbo ng biktima subalit alas-12:20 ng hatinggabi ay hinarang ng grupo ni Bobby ang biktima na noon ay pauwi na, sakay ng ipinapasadang tricycle at kasama ang ka-live-in na si Aureine Ferrer, 31, sa kanto ng Decena at Libertad St.
Kaagad umanong pinalo ng baton ni Bobby si Alcantara subalit nakailag at nagawang makatakbo kaya’t pinagbalingan ng galit ng suspek ang kinakasama ng biktima. Hinabol naman ng ilang mga kasamahan ng suspek ang biktima at isa sa mga ito ang nagpaputok ng baril na tumama sa balikat ni Alcantara.
Hinahanap na ng pulisya ang suspek na si Bobby, pati na ang bumaril sa biktima at ilan pa nilang kasamahan.
The post Trike driver kinuyog, todas appeared first on Remate.
.. Continue: Remate.ph (source)
No comments:
Post a Comment