ARESTADO ang isang babae matapos mabuking nang magsisigaw at mahulihan ng shabu sa isinagawang anti-criminality campaign ng Motorized Anti-Street Crimes Opretaives (MASCO), Malate Police Station (PS-9) kagabi.
Nakapiit na ngayon sa MPD-PS 9 ang suspek na si Maria Ruby Cruz, alyas Maru, 54, walang asawa, vendor, ng # 1927 Ma. Orosa St., Malate, Maynila.
Sa ulat, alas-7:30 ng gabi ng arestuhin nina PO1 Daniel Grospe at PO1 Jose Asaytuno, Jr., si Cruz sa kahabaan ng San Andres kanto ng Ma. Orosa St.
Nauna rito, nagsasagawa ng anti-criminality campaign ang nasabing mga pulis nang maispatan ang suspek na nagsisigaw at nagmumura ng “mga walanghiya kayo magbayad kayo ng utang nyo, ang kapal ng mukha n’yo”.
Dahil nakakabulahaw ay nilapitan ito nina Grospe at Asaytuno kung saan nagpakilala silang mga pulis para pigilan sa nagwawalang suspek.
Dito na umano napansin ng mga pulis na tila may itinatago ang suspek sa kanyang kamay.
Nang tingnan ang hawak ng suspek ay nakita ang isang plastic sachet ng shabu.
Dahil dito, agad na binitbit ang suspek sa himpilan ng pulisya para sa tamang disposisyon. JOCELYN TABANGCURA-DOMENDEN
.. Continue: Remate.ph (source)
No comments:
Post a Comment