HINDI kaya tayo nasosobrahan sa pagbibigay ng atensyon sa mga big time na magnanakaw na galit sa mga kapwa magnanakaw?
Sa totoo lang, nakasasawa nang pakinggan ang mga usapan ng mga nasa itaas, lalo na kung iisipin na ang lahat ng ito’y paghahanda sa nalalapit na halalang 2016.
Ang malaking katanungan sa mga nag-aaway-away ukol sa kanilang mga pagnanakaw sa kaban ng bayan, eh: nasaan ang para sa mga mamamayan, lalo na ang mga maliliit?
Ang patuloy kasi na awayan sa politika ay lalong titindi habang lumalapit ang halalang 2016 at lalong kumaklaro na higit na iniintindi ng mga politiko ang kanilang mga sarili at ang paggapang nila para makuha ang puwesto sa pamahalaan na puntirya nila.
Kung mababanggit man nila ang mga maliliit na mamamayan na milyon ang bilang, sila’y turing na mga botante lang at mabibingwit nila sa halalan.
ANIHAN NG MGA MAGSASAKA
Sa pamamasyal o pagbibiyahe natin sa mga lalawigan, napansin natin na buhay na buhay ang mga sakahan.
Anihan na pala. Inaani na ng mga magsasaka ang kanilang mga itinanim na palay nitong nakalipas na tag-ulan.
Hindi man naririnig ng mga magsasaka, pinasasalamatan natin sila sa tiyaga nilang makipagbuno sa lupa at kalikasan upang may makain tayong lahat.
Naalala tuloy natin ang mga kabataan na anak mismo ng mga magsasaka.
KABATAAN AYAW MAGSAKA
Alam ba ninyong marami na at dumarami ang mga kabataan na ayaw nang magsaka… maging ang anak ng mga magsasaka?
Ito’y dahil sa kakulangan ng kita sa pagpapalay.
Sabi nila, bagama’t sila ang nagtatanim at nagtitiyak na mayroong makakain ang buong bayan, sila mismo ay biktima ng gutom.
Sila’y nabubuhay sa gutom dahil sa laki ng gastos sa pagsasaka at sulit-sulit lang ang ani laban sa gastos. Mahal ang abono, mahal ang diesel at gasolina para sa pag-aararo, paglilinang hanggang sa pag-thresser.
Pagkatapos sasalantain pa sila ng kalamidad ng kalikasan at mga usurero.
Sabi nila, marami sa kanila na pagdating ng anihan, magsasako na lang sila. Sako na lang pala ang natitira kung magbayad na sila ng utang para sa gastos sa produksyon at interes sa kanilang mga utang sa pagsasaka.
NASAAN ANG GOBYERNO
Medyo kinakabahan nga tayo habang iniisip natin na baka darating ang araw na wala na tayong magsasaka kung magpapatuloy ang kawalan o labis na kakulangan ng kita ang mga magsasaka.
Nasaan nga pala ang gobyerno ukol sa problema ng mga magsasaka?
Ang malinaw sa atin, mga Bro, gusto pa ng mga nasa pamahalaan ang umangkat nang umangkat ng bigas kaysa tulungan ang mga magsasaka natin.
Dahil ba sa may kita sa importasyon sa bigas mula sa overpricing ng bigas at komisyon sa mga barko at trak na nagbibiyahe ng mga imported na bigas. At dahil ba sa may malaki ring kita sa pagbebenta ng bigas na imported sa malalaking rice trader sa bansa?
SA THAILAND AT VIETNAM
Kung pag-aaralan natin ang mga bansang Thailand at Vietnam, nagpapaligsahan ang mga ito sa pagiging number one na exporter ng bigas sa buong mundo.
May buhay sa pagsasaka para sa kanila…bukod pa sa nakatitiyak sila na sila’y may pagkain at walang gutom kung magkaloko-loko ang hapag-kainan sa ibang mga bansa.
Ang Pilipinas ay katulad ng mga bansang ito na may mayayamang lupain para sa pagsasaka.
Pero nasaan ang aksyon ng gobyerno para paunlarin nang todo ang pagsasaka?
Ni hindi nga tayo makakita ng mga bilaran ng palay na gawa ng gobyerno at sa mga kalsada nagbibilad ang mga ito ng kanilang mga ani.
Ginigipit din ng pamahalaan ang mga magsasaka sa gamit sa produksyon gaya ng pagpapataw nito ng 10% Value Added Tax sa lahat ng mga produktong petrolyo na gamit sa pagsasaka.
At alam ba ninyong hindi peborit na suki ng mga bangko ng gobyerno ang mga magsasaka?
‘Yun bang === bantulot ang mga bangko ng gobyerno na magpautang sa mga magsasaka kaya tumatakbo ang mga ito sa mga usurero na nagpapahirap din sa kanila sa kalaunan.
Kung isama ang lahat ng ito sa kabuktutan ng mga opisyal ng bayan sa importasyon ng bigas, anak ng tokwa, walang mangyayari sa pagsasaka sa Pilipinas.
DROGA AT KRIMEN
Mayroon pang nagaganap sa buhay ng mga maliliit na mamamayan na hindi pinapansin ng mga hinayupak na politiko at lider ng Pinas.
Ang krimen.
Nabubulahaw tayo lahat kung may nare-rape at napapatay na mga estudyanteng babae sa mga unibersidad. At lalong nabubulahaw tayo kung konektado sa drog ang mga krimeng ito.
Ngayon naman ay may kaso sa Sorsogon na katulad ng mga rape-slay halimbawa sa University of the Philippine – Los Baños.
Isang 16-years old na estudyante at nanalo sa beauty contest ang natagpuang nagapos sa masking tape ang mga paa at pinaghihiwa ito ng razor blade sa iba’t ibang bahagi ng kanyang katawan sa Bgy. Luneta, Barcelona.
May babala pa na iginuhit sa pentel pen sa kanyang katawan na sasapitin nito ang kamatayan ng isang titser sa Sorsogon sa susunod na mga araw.
Kademonyohan ito na maaaring gawa ng mga nakadroga.
Ano na nga pala ang ginagawa ng mga palaaway na politiko sa mga krimeng ganito na karaniwang mga maliliit na mamamayan ang mga biktima?
oOo
Anomang reklamo o puna ay maaaring iparating sa www.remate.ph o i-text sa 09214303333. ULTIMATUM/BENNY ANTIPORDA
.. Continue: Remate.ph (source)
No comments:
Post a Comment