P400-M nananakaw sa bangko dahil ATM fraud

HALOS nasa P400 million ang nananakaw na ng mga sindikato na sangkot sa ATM fraud sa mga bank deposits sa loob ng dalawang taon.

Isiniwalat ni Philippine National Police (PNP) Anti-Cyber Crime Group director S/Supt. Gilbert Sosa, na batay sa kanilang datos noong 2012 ay nasa P175 million na ang nananakaw ng mga sindikato at noong nakaraang taon ay umabot naman ito sa P220 million.

Ibinunyag ni Sosa na kalimitan na ikinakabit ng mga sindikato ang ginagamit nilang skimming plate tuwing gabi o madaling-araw.

Sinabi ni Sosa na mayroon na silang sinusundang tao o grupo na sangkot sa ATM fraud.

Samantala, ayon naman kay PNP PIO chief Supt. Reuben Theodore Sindac, iniimbestigahan na ng PNP Anti-Cyber Crime group ang naarestong si Lt. Senior Grade Raphael Marcial na nakuhanan ng mga blankong ATM cards at scanner machine.

Ani Sindac, may nabanggit na grupo si Marcial subalit tumanggi itong idetalye sa media para hindi maapektuhan ang operasyon.

Inalis na si Marcial sa Presidential Security Group (PSG) sa Palasyo at nasa kustodiya na ito ngayon ng kanyang mother unit na Philippine Navy.

Pagtitiyak pa ni Sosa, puspusan ang kanilang ginagawa upang masugpo ang sindikato sa ATM fraud.

The post P400-M nananakaw sa bangko dahil ATM fraud appeared first on Remate.

.. Continue: Remate.ph (source)

P400-M nananakaw sa bangko dahil ATM fraud