Muntik mag-suicide dahil depress!

MALUGOD na nagpaunlak ng interbyu sa amin ang komedyante g si Wally Bayola nu’ng magkita kami sa 10th anniversary ng Zirkoh Comedy Bar. Sa unang pagkakataon ay inilahad ni Wally ang pinagdaanan niya sa sex video scandal nila ng EB Babe Yosh Rivera.

“Nu’ng nakita ko na lumabas na sa social media ‘yun (sex video), hindi ko alam kung ano ang gagawin ko. Nagkulong ako sa kuwarto. Pumasok pa sa isip ko na tapusin ko na nga, eh. ‘Yung gusto ko nang magbaril sa sarili,” lahad ni Wally

Kinuha raw niya ang kanyang baril sa loob ng kuwarto nila ng misis niya at sa harap ng computer niya, walang tigil ang paghimas-himas niya sa kanyang baril.

“Konting-konti na lang puwede na siyang sumabog. Biglang nag-ring ang telepono. Parang save by the bell. Tumawag sa akin ‘yung NBI. After ng pag-uusap namin, nakalimutan ko na ‘ng balak ko na pagpapakamatay.

“Ang ginawa ko, tinawagan ko si Jose (Manalo). Tinawagan ko rin ‘yung ibang kasama ko sa ‘Eat Bulaga.’ Hindi sila sumasagot. Siguro mga tulog na kasi madaling-araw na ‘yun.

“Si Jose, hindi rin sumagot sa tawag ko. Kaya nag-text ako sa kanya. Maya-maya sumagot siya. Sabi ko kausapin niya ako. Sabi niya, ‘Kaya mo ‘yan. Dumaan din ako sa matinding problema, nakaya ko. Kaya mo rin!

“Tapos sabi pa niya, ‘Puntahan mo ang anak mo sa ospital. Pumuntahan mo siya ngayon. Pumunta ka ng ospital.’

“Pagkatapos naming mag-usap, punta agad ako sa anak ko. Paglapit ko sa anak ko, hindi pa ako nagsasalita, sabi niya, ‘Ikaw kasi Papa, e.’

“Sabi niya magdasal kami. Nag-lead siya ng prayer, kaming tatlo ng asawa ko, magkakahawak-kamay kami. Habang nagdadasal kami, grabe ang iyak ko. Doon lang ako nakaiyak ng ganoon. Pero pagkatapos naming magdasal, gumaan ang pakiramdam ko,” maiyak-iyak na kuwento ni Wally.

Grabe raw ang depresyon niya nu’ng time na ‘yun. Hindi nga raw siya makakain at ayaw lumabas ng kuwarto niya. Kasunod noon, ilang buwan siyang walang trabaho.

Kaya siya na mismo ang tumawag sa manager niya at executive ng “Eat Bulaga” na si Malou Fagar para payagan siya na makabalik kahit sa Zirkoh para magkaroon ng income. Pero hindi lang sa Zirkoh nakabalik ngayon si Wally, kundi pati na sa “Eat Bulaga.”

-ooOoo-

IPAPALABAS na ngayong Sabado ang much-awaited episode ng komedyanteng si Pokwang sa “Maalaala Mo Kaya. Isang matiising asawa at masipag na ina ang karakter na bibigyang buhay ni Pokwang sa nasabing drama anthology ng ABS-CBN.

Gaganap siya bilang si Mely, ang maybahay na nagbulag-bulagan sa pambababae ng kanyang mister upang mapanatiling buo ang kanyang pamilya. Paano naikubli ni Mely mula sa kanyang mga anak ang kasalanan ng kanyang asawa? Ano ang kwento sa likod ng 15 taon niyang pag-iikot sa mga kalye ng Bacolod para magbenta ng arrozcaldo?

Bahagi rin ng “MMK” episode ni Pokwang sina Emilio Garcia, Marco Gumabao, Lance Lucido, Beauty Gonzalez, Althea Guanzon, Brian Poe Llamanzares, Celine Lim, Aaron Junatas, Abby Bautista, Jun Urbano, Jef Gaitan, Yda Yaneza, at Carla Guevarra. Ang episode ay idinerek ni Garry Fernando, sinulat nina Mary Rose Colindres at Arah Jell Badayos at isinaliksik ni Michelle Joy Guerrero.

Ang “MMK” ay pinamumunuan ng business unit head nito na si Malou Santos, production manager na si Roda Dela Cerna at executive producer na si Lindsay Anne Dizon. Huwag palampasin ang longest-running drama anthology sa Asya, “MMK” ngayong Sabado ng gabi pagkatapos ng “Wansapanataym” sa ABS-CBN.

The post Muntik mag-suicide dahil depress! appeared first on Remate.

.. Continue: Remate.ph (source)

Muntik mag-suicide dahil depress!