Nourishment program para sa mga Mangyans, ilulunsad

MAGIGING “malnourished-free” na ang mga Indigenous People o Mangyans sa rehiyong nasasakop ng MIMAROPA.

Ito’y matapos ilunsad ng Department of Health (DoH) – MIMAROPA ang kanilang nourishment program for Indigenous People o programa para sa “Masustansyang Pagkain para sa Katawan at Isipan” sa Bgy. Lantuyang, Baco, Oriental Mindoro.

Ayon kay DOH-MIMAROPA Regional Director Dr. Eduardo Janairo, layon ng programa na maalis na ang malnutrisyon sa rehiyon upang sa gayun ay magkaroon ng malusog at matalas na isipan ang mga Mangyans o katutubo.

Simula sa edad na 5 pababa ang sakop sa nasabing programa dahil ito aniya ang mga edad na dapat tutukan at kailangan ng tamang bitamina at sustansya sa katawan para na rin sa kanilang paglaki.

“Most of the IP’s in MIMAROPA lives in poverty and farming root crops and fruits is their only means of support. A recent study has shown that most of the undernourished children are preschool-aged and belong to the IP groups,” ayon kay Janairo.

Kaya naman sa tulong ng Department of Agrarian Reform (DAR) ay sasanayin ang mga katutubo kung paano palalaguin ang kanilang mga tanim na prutas at root crops para sa kanilang pangangailangan.

“These children must be nourished with proper nutrition in otder to prevent the risk of a long-term functional impairment, such as poor educational and intellectual performance. Our objectives is for MIMAROPA to be malnourished-free,” dagdag pa ng opisyal.

Magbibigay ang DOH-MIMAROPA ng “full meal” araw-araw sa loob ng 90-araw sa 12 tribo kabilang sa Isla ng Iraya, Batangan, Buid, Hanuno‘o, Alangan, Ratagnon, Tagaydan (o Tadyawan), Bangon, Pula, Buhid, Nauhan at Furuan. Ang nasabing mga tribo ay may kanya-kanyang lenggwahe, kultura at pamamaraan ng pamumuhay.

Imo-monitor at i-evaluate ito ng Department of Social Welfare and Development (DSWD) matapos ang 3 buwan.

Kasama sa nutri-pack food na ipapakain sa mga katutubong Mangyan mula naman sa Department of Science and Technology (DOST) ang cookies, snacks curls na may coconut flour, iron-fortified rice, rice crispy bars, rice mongo-curls at iba pang vitamin fortified snacks.

Nabatid na ang mga Mangyans sa bayan ng Baco ay nangunguna pagdating sa kakulangan sa nutrisyon kaya naman inilunsad ang Nourishment Program for Indigenous People ng DOH-MIMAROPA at local government. JOCELYN TABANGCURA-DOMENDEN

.. Continue: Remate.ph (source)

Nourishment program para sa mga Mangyans, ilulunsad