GINABAYAN ni former world ten-ball champion Pinay cue artist Rubilen “Bingkay” Amit ang Team Asia upang makuha ang back-to-back title sa katatapos na 2015 AM8.com Queens Cup billiards tournament na ginanap sa Resorts World Manila.
Tinumbok ng Team Asia na kinabibilangan nina skipper Amit, reigning world’s No. 1 Siming Chen ng China, former rookie of the Year Eunji Park ng South Korea at dating world’s No. 1 Jennifer Chen ng Taiwan ang Team West, 10-7 nina Texas Tornado Vivian Villarreal, Karen Corr ng Ireland, Jennifer “9MM” Barretta ng USA at Team Captain Ewa Mataya Laurance ng Sweden para manatili ang titulo sa Asian billiards players.
Bago nag-umpisa ang final day sa event na tumagal ng tatlong araw ay abante ang Team Asia, 7-4 subalit naitabla ito ng Team West nang tumbukin ang tatlong unang laro.
Pinataob ni Corr si Park, 4-2 sa unang singles event.
Nagkampihan sina Corr at Barretta para bokyain sina Park at J. Chen sa doubles event at tapyasin sa isang puntos ang abante ng Team Asia sa Team West, 7-6.
Sa pangalawang singles pinayuko ni Corr si S. Chen, 4-3 para itabla ang iskor sa 7-7.
Bumalik ang bentahe sa Team Asia, 8-7 ng pangunahan ni Amit ang kanyang mga kakamping sina S. Chen, J. Chen sa 3-on-3 para talunin ang Team West, 4-0.
Nanaig ang Team Asia sa 4-on-4 ng ilista nila ang 9-7 at mamuro sa pagsungkit sa asam na titulo.
Sinargo naman ni Amit ang pangatlong singles event para ibigay ang Team Asia ang pangalawang kampeonato.
Pinagpag ni Amit si Villarreal, 4-1 para sa huling panalo ng Team Asia. ELECH DAWA
.. Continue: Remate.ph (source)
No comments:
Post a Comment