LONDON (AP) — Ang strain ng bird flu na inakala ng mga scientist na hindi makahahawa sa tao ay unang nasuri sa isang babaeng Taiwanese, isang nakakagulat na pangyayari na nagpapakitang kailangang paigtingin pa ng mga scientist ang pagbabantay para masilip ang nakababahalang flu strain bago ito magbunsod ng pandaigdigang outbreak, pahayag ng mga doktor.
Ang babae, 20, ay naospital noong Mayo sa lung infection. Matapos lunasan ng Tamiflu at mga antibiotic, siya ay inilabas.
Isa sa kanyang throat swab ay ipinadala sa Taiwan Centres for Disease Control. Natukoy ito ng mga eksperto roon na H6N1 bird flu, na karaniwang kumakalat sa mga manok sa isla.
Ang pasyente, na hindi kinilala, ay nagtatrabaho sa isang deli at walang koneksiyon sa live birds. Hindi maiintindihan ng mga imbestigador kung paano siya nahawa. Ngunit napansin nila ang ilan sa kanyang mga kapamilya at kamag-anak ay nagkaroon din ng flu-like symptoms matapos siyang makasalamuha, ngunit walang naging positibo sa H6N1. Ang research ay inilathala online noong Huwebes sa journal na Lancet Respiratory Medicine.
Dahil ang H5N1 bird flu strain ay unang nasuri sa katimugan ng China noong 1996, binabantayan na ng public health officials ang progreso nito — pumatay na ito ng mahigit 600 katao, karamihan ay sa Asia. Ilan pang strain ng bird flu, kabilang ang H7N9, na unang natukoy sa China noong Abril, ang nagdulot din ng pagkabahala ngunit wala pang nag-mutate sa pormang maaaring mabilis na makahawa sa tao.
“The question again is what would it take for these viruses to evolve into a pandemic strain?” sulat ni Marion Koopmans, virologist sa National Institute for Public Health and the Environment sa Netherlands, sa isang komentaryo na kasama sa bagong ulat.
Sinabi niya na nakababahalang walang naging early warning signals ang mga scientist na ang bagong bird flu ay magiging problema hanggang sa nagkasakit ang mga tao. Kadalasang binabantayan ng mga scientist ang mga ibon para masundan kung aling virus ang pumapatay sa kanila, isang pagsisikap na mahulaan kung aling flu strain ang maaaring maging problema sa tao — ngunit wala sa H6N1 o H7N9 ang nagdulot ng pagkakasakit ng mga ibon.
Nanawagan si Koopmans ng pagpapaigting sa surveillance sa mga flu virus sa hayop at karagdagang mga pananaliksik sa paghuhula kung saang mga virus ang maaaring magdulot ng pandaigdigang krisis.
“We can surely do better than to have human beings as sentinels,” sulat niya.
.. Continue: Balita.net.ph (source)
No comments:
Post a Comment